Pabuto likayan -- Alix

CEBU – Giawhag ni Konsehal Christopher Alix ang mga Sugbuanon nga likayan gyud ang paggamit og mga pabuto atol sa pagsugat sa Bag-ong Tuig aron malayo sa disgrasya.

Labing minos napulo ka mga tawo lakip na sa mga bata ang nalandig sa duha ka publikong tambalanan sa dakbayan niadtong Pasko human mabuthi sa mga firecrackers ug sa kinatibuk-an sa Rehiyon 7 nakatala ang Department of Health og 29 ka nabuthan.

Ang konsehal nga maoy chairman sa Committee on Health sa City Council nisugyot sa paggamit og laing mga butang sa pagsaba-saba pagsugat sa Bag-ong Tuig imbes sa mga pabuto.

Kini sama sa mga lata nga pangguruyon, torotot ug uban pang mga butang nga makahatag og banha sa palibot apan dili makahatag og kadaut sa panglawas.

“Mahimo gani og bosina sa sakyanan, lata ug torotot, bisan unsa basta mutingog lang maayo na kaayo na,” nagkanayon si Alix.

Ang pagsaba-saba atol sa pagsugat sa Bag-ong Tuig nahimo nang kabahin sa kultura sa mga Pilipino ilabi na sa mga Sugbuanon tungod sa pagtuong mapalayas niini ang demalas. ­–BANAT NEWS