Tawo giluba patay

CEBU - Patay ang usa ka tawo nga giluba didto sa sitio San Jose, barangay Maguikay, dakbayan sa Mandaue sa miaging kaadlawon.

Ang biktima mao si Rodellio Illustrisimo, 34, minyo nga nagpuyo sa maong dapit, samtang wala pa hiilhi ang mibuno kaniya.

Si PO2 Marino Lufranco sa investigation section sa kapolisan sa maong dakbayan mibutyag sa Banat News nga ang biktima naglakaw lang sa maong lugar dihang gikasugat niini ang kriminal.

Matud pa ni PO2 Lufranco nga wala makabantay ang biktima dihang kalit lang kining gihansakan sa kutsilyo sa walay igong hinungdan.

Tungod kay nasabak sa ubos nga bahin sa walang dughan, nalup-og dayon sa yuta ang biktima.

Ang mga barangay tanod sa maong lugar nga nakaalinggat sa hitabo maoy midali paghatod sa biktima ngadto sa Mandaue City District Hospital apan gideklarar kini sa mga doctor nga dead on arrival.

Padayon pang gihimo sa kapolisan ang imbistigasyon aron mailhan ang kriminal.   (BANAT NEWS)