Akusado pagpatay sa mayor naabsuwelto

CEBU - Ang kanhi polis kinsa maoy akusado sa pagpatay sa kanhi mayor sa lungsod sa Santa Fe kapin na sa usa ka tuig ang nakalabay, giabsuwelto sa korte gumikan sa kakuwang sa mga ebidensya batok kaniya.

Si PO2 Arnulfo Pigon Jr. kinsa usa ka kanhi polis sa dakbayan sa Mandaue gipagawas na sa prisohan niadtong Disyembre 23 ning tuiga.

Si Judge Ester Veloso maoy miabsuwelto kang Pigon tungod sa kakuwang sa mga basehanan sa pagtumbok nga siya maoy mipatay kang anhing Mayor Rogilio Illustisimo Sr. sa lungsod sa Santa Fe.

Mahinumdoman nga si mayor Illustrisimo mao pay paggawas gikan sa buhatan sa Commission on Elections (Comelec) diha sulod sa compound sa Cebu Provincial Capitol sa alas 10:30 ang takna sa buntag niadtong Mayo 2, 2007 dihang giluthang siya sa makaduha ka higayon sa usa ka tawong wala hiilhi.

Apan si Judge Veloso sa iyang pagtimbangtimbang sa mga argumento sa prosikusyon, nasuta niya nga gibase lamang niini sa mga pamahayag sa mga testigos ang kasong giduso nila batok sa suspetsado.

Namatud-an usab ni Judge Veloso nga hungaw kaayo ang mga ebidensyang gipaila sa prosikusyon batok kang Pigon dihang kanunay nga dili magkatukma ang mga pamahayag sa mga testigos batok kang Pigon.

Ang mga tistigos mao ang usa ka drayber sa taxi ug duha ka drayber sa traysikol kansang mga pamahayag wala magkadimao ug wala gayud magkatukma sa matag paminaw sa kaso, nga nakapasamot sa kalugak sa kamatuoran pagtumbok nga si Pigon gayud maoy mamumuno kang kanhi mayor Illustrismo.

Sa pagpakanaog sa desisyon, si Judge Veloso nagkanayon nga sa kasong criminal kinahanglang may duha ka butang ang ipamatuod sa prosikusyon.

Ang una mao ang pagkahitabo sa krimin, ug ang ikaduha mao ang pag-ila sa kriminal nga mihimo sa maong krimin.