Revision sa COA Circular gilauman

CEBU - Malaumon si Cebu City Acting Mayor Michael Rama nga hingpit nang usbon sa Commission on Audit (COA) ang guidelines niini nga COA Circular 2007-001 nga nakatandog usab sa ubang lokal nga kagamhanan.

Kini nagdili sa mga Local Government Units (LGU) paghatag og financial assistance ngadto sa usa ka organisasyon kung ang mo-release sa pundo dunay relasyon sa hatagan niini.

 Hinuon ang COA dili pa lang dugay nga nihatag og exemption sa City government nga maka-release og pundo ngadto sa Sinulog Foundation.

Kini human mohangyo ang kagamhanan sa dakbayan pinaagi ni Rama kinsa mao usab ang overall chairman sa Sinulog 2009 nga ma-release sa siyudad ang gigahin niining P8 milyones alang sa premyo sa mga mananaug nga contingent sa Sinulog 2009.

Nasayran nga ang City government regular usab nga maghatagan og financial assistance sa ubay-ubay nga mga organisasyon matag tuig.

Kini sama sa Cebu Investment Promotion Center (CIPC), Cebu Pistol and Rifle Association (CPRA), Dancesport Team ug uban pa.

Lakip na niini ang Cebu City Task Force on Street Children, The Children of Cebu Foundation ug ang Operation Second Chance nga pulos gidumala ni Margot Osmeña.

Nanghinaut si Rama nga usbon sa COA ang gipagawas niini nga circular aron magpadayon ang assistance sa siyudad ngadto sa hingtungdang mga organisasyon.

Kini aron magpadayon usab ang operasyon niini ilabi na ang pagtabang sa mga molupyo sa dakbayan nga nanginahanglan sa ilang serbisyo.

“I hope that they will go over and perhaps they might come up with one very clear revision or modification of the guidelines,” sumala ni Rama. (BANAT NEWS)