CEBU - Giabsuwelto sa korte ang usa ka gipasanginlang drug user sa barangay Duljo-Fatima ning siyudad sa Sugbu sa kasong paghupot og illegal nga drugas tungod sa sayop nga pag-rekisa sa kapolisan.
Ang giabsuwelto ni RTC-7 Branch 13 Judge Meinrado Paredes ang usa ka Joel Barcenas, hingkod ang panuigon ug taga sitio Plastikan sa maong barangay.
Nasayran nga niadong Marso 15, 2004 pasado alas 3 sa hapon, mipahigayon og saturation drive ang grupo ni SPO1 Jaime Otadoy sa Cebu City Police Office sa Plastikan, Duljo-Fatima.
Matud pa sa mga polis nga nakasakop kaniya pinanguluhan ni Otadoy nga may gikumkom sa kamot ni Barcenas nga gidudahang ilegal nga drugas ug tungod niini gikatahong gimandoan nila kini pagbukas sa iyang palad.
Giingong diha sa palad sa suspek ang .04 gramos nga gidudahang shabu hinungdan nga ilaha kining gisikop ug gipasakaan og kaso.
Apan si Paredes nagkanayon diha sa iyang desisyon nga wala mosubay sa “plain view doctrine” ang nakita sa kapolisan maong di sad kini mahimong arestuhon nga walay warrant of arrest.
Kini ang hinungdan nga gipakawalay-sala sa korte sa kasong illegal possession of prohibited drugs si Barcenas. (BANAT NEWS)