Eksplosibo di na masayon-sayon sa Akta Republika 9516

CEBU - Gihangop ni Cebu City Councilor Yayoy Alcoseba ang bag-ong naaprubahang balaud nga magpahamtang og mas bug-at nga silot niadtong masakpang illegal nga nanghimo, nagbaligya ug magdala og mga eksplosibo.

Ang Akta Republika 9516 gikataho nga bag-o lang gipirmahan ni Presidente Gloria Macapagal Arroyo nga maoy nag-amendar sa Presidential Decree 1866 nga napanday pipila ka dekada na ang nakalabay.

Ubos sa bag-ong balaud, mahimong masilutan og reclusion perpetua o tibuok kinabuhi nga pagkabilanggo kadtong masakpan ug mapamatud-ang illegal nga nanghimo, nagbaligya bisan gani kadtong naghupot og mga sagol sa himuong eksplosibo.

“Unlawful manufacture, sales, acquisition, disposition, importation or possession of a part, ingredient, machinery, tool or instrument used or intended to be used for manufacture, construction, assembly, delivery or detonation are prohibited,” tipik sa bag-ong balaud.

Matud ni Alcoseba nga pinaagi sa nahisgutang balaud, magduha-duha na unya ang mga illegal manufacturers sa paghimo ug pagpalusot og mga eksplosibo ngadto sa mga badlungon sa katilingban sama sa mga terorista.

Isip vice chairman sa Committee on Public Order and Safety sa City Council niingon nga hugot niyang gihangop ang gihimong pagpirma sa presidente nga naghingpit nga balaud sa Akta Republika 9516.

Malaumon siyang pinaagi sa bag-ong balaud maminusan na unya ang mga insidente sa illegal possession of explosives nga yano lang dalhon niadtong mga tawo nga mumugna og kasamok pinaagi sa pagpamomba.   (BANAT NEWS)