CEBU - Nisampot ngadto sa usa ka dugoong panghitabo ang pagsaulog sa Pasko human duha ka magsuon ang namatay ug laing duha ang naangol sa pagpamusil sulod sa gipahigayong disko sa bukirang bahin sa barangay Magsiko lungsod sa San Fernando kagahapon sa ala 1:30 sa kaadlawon.
Ang namatay’ng magsuon mao sila si Jomar Villarisa, 23, nagpuyo sa sitio Matin-aw barangay Tunggo sa maong lungsod samtang ang igsoon niining si Magno Villariasa Jr, nagpuyo sa susamang lugar.
Samtang ang nangaangol mao ang laing igsoon sa mga biktima nga si Michael Villariasa, ug ang usa ka Rico Paradero, 23, nagpuyo sa barangay Bugho sakop sa maong lungsod.
Ang mga suspek mao sila si Tomas Flores, 33, taga sitio Luna barangay Magsiko ug Marciano Paradero Manayon, 22, nagpuyo usab sa maong lugar.
Matud ni SPO2 Sherwin Abellare sa San Fernando Police dihang nahinabi sa Banat News nagsayaw ang mga biktima niadtong tungura dihang nagkabingkil ang mga suspek nga pulos na nakainom.
Tunga-tunga sa kagubot kalit lang namusil ang mga suspek hinungdan pagkatibulaag sa mga tawo ug human mahawan ang mga tawo nabilin ang upat nga pulos na nga nagkadugo.
Patay diha-diha si Jomar samtang gidala sila si Magno sa Vicente Sotto Memorial Medical Center (VSMMC) diin kini makabsi sa kinabuhi sumala pa ni SPO2 Abellare base sa gibutyag sa mga tagtungod kagahapon sa udto.
Ang kapulisan naka-recover og duha ka kabhang sa bala nga kalibre .45 ug laing usa ka buhing bala sa crime scene.
Samtang nasikop usab dayun ang duha ka mga suspek tungod kay daling naka-responde ang mga polis ug pareho nga nahilam sa rehas sa prisuhan sa maong lungsod. (BANAT NEWS)