Durano mibubo og P2M project

CEBU - Si Kongresista Ramon “Red” Durano VI sa ikalimang distrito sa lalawigan sa Sugbo mihatag og P2 milyones nga kantidad nga proyekto atol sa closing ceremony sa RED Christmas Bazaar 2008 niadtong Domingo sa gabii didto sa dakbayan sa Danao.

Ang Kongresista maoy nangunay paghatag sa award sa Best of Show to Municipalities nga naangkon sa mga lungsod sa Pilar ug Tudela sa Isla sa Camotes kinsa nagkatabla sa score sa Bazaar competition.

Gawas sa plaque of recognition si Durano dunay gigahin nga P500,000 nga proyeko sa mga lungsod nga maoy mananaog.

Laing P1 milyon nga balor sa proyekto ug cash ang gitunol , ni Durano   ngadto sa mga midaog sa sing and dance competition nga gisalmotan sa tanang lungsod nga sakop sa ikalimang distrito.

Nidugang ang Kongresista nga iyang ipadayon ang RED Christmas Bazaar matag tuig aron mailhan ang mga produkto sa mga gagmayng negosyante diha sa iyang distrito.

Duna usab silay training, seminar og uban pang ayuda nga itabang sa kagamhanan aron nga mas epektibo ang pagpadagan sa ilang negosyo.

Ang Red Christmas Bazaar gibuksan niadtong Huwebes sa miaging semana ug gitapos usab niadtong Domingo ubos sa pag-abag sa Department of Trade and Industry, (DTI).

Si Gleena Taripe sa lungsod sa Compostela maoy midaog sa singing contest ug midawat sa premyo nga P5 mil ug P500 mil nga kantidad sa proyekto alang sa Compostela.

Samtang ang “Strikers” dance group sa lungsod sa Carmen maoy mibulsa sa unang ganti nga P10 mil ug dugang P500 mil nga kantidad sa proyekto alang sa maong lungsod.

Ang lungsod sa Catmon nga gi-presentahan ni James Laurel maoy midaog sa ikaduha nga nakadawat og P3 mil ug si Dairyl Polancos sa Tudela nakakuha sa ikatulo nga may P2 mil nga premyo ang uban nga wala makadaog nakabulsa og P1,000 matag usa isip consolation prize.

Ang mga sakop sa Street Bombers Dance Crew sa Danao City mao usab ang nakadawat og P7 mil isip ikaduha ug P5 mil sa Six Hood Lumz sa Tudela alang sa ikatulo samtang ang uban nga mga entrante nga wala makadaog adunay tag P2 mil nga consolation prize nga nadawat.   (BANAT NEWS)