Pabuto ihuwes de kutsilyo

CEBU - Ilusad sa kagamhanan sa dakbayan sa Sugbu ang huwes de kutsilyong kampanya batok sa mga negosyante og pabuto diha sa Carbon Public Market.

Kini pinaagi sa pagpanakop sa maong mga pabuto ug dili na gyud iuli ngadto sa nagbaligya niini, matud pa ni City Market Administrator Raquel Bohol Arce.

Matud ni Arce nga pabug-atan nila ang kampanya kay dili gyud patuo og badlong ang mga negosyante diha sa Carbon kay makadungog gihapon siya og mga firecrackers nga pabuthon diha sa maong lugar panahon sa kagabhion ug kaadlawon.

Midugang si Arce nga nakig-alayon na sila sa kapulisan aron sa pagsakmit niadtong mga firecrackers nga ilang makita nga gipamaligya.

Gitataw ni Arce nga ila nang gipasidan-an ang mga manindahay nga wala itugot sa siyudad ang pagpaninda og mga pabuto sulod sa merkado.

Ang kagamhanan sa dakbayan mitudlo na sa South Road Properties (SRP) nga maoy isipong firecracker zone diin adto lang itugot ang pagpamaligya og pagpabuto sa mga rebentador.

Midugang ang market administrator nga kadtong mga firecrackers nga masakmit atol sa himuon nilang operasyon dili na ibalik ngadto sa mga tag-iya.

Kini maoy mensahe ngadto sa mga firecracker dealer ug trader sa dakbayan nga seryoso ang kapulisan sa ilang kampanya batok sa mga pabuto. (BANAT NEWS)