Tulo nakombikto, 4 sad ang naabswelto sa'drugs'

CEBU - Tulo ka mga batan-ong tiggamitan og ginadiling drugas ang gikonbikto sa korte human namatud-ing nigamit og illegal drugs atol sa gipahigayon nga ronda sa dakbayan sa Naga.

Si Judge Raphael Yrastorza Sr., presiding judge sa RTC-7 Branch 14, nikonbikto nila ni Joselito Magila, 20; Virgilio Pardo, 21; ug usa ka minor de edad pulos lumad nga taga Inuburan dakbayan sa Naga.

Hinuon, unom lamang ka bulan nga pagkabilanggo ug pagmulta nga tag P10 mil matag usa ang gisilot ni Yrastorza ngadto sa tulo ka mga drug users.

Gihatagan og gibug-aton sa huwes ang mga testimonya sa kapolisan sa Naga nga gipangulohan ni SPO2 Vicente Rama nga nipahigayon og ronda sa usa ka drug den nga giingong gipanag-iya sa usa ka Roberto Barricuatro sa Inuburan, Naga City niadtong Enero 21, 2004.

Atol sa maong operasyon nasakpan ang tulo ka mga batan-on nga naa sa sulod sa drug den ug giingong bag-o lamang nakagamit og illegal nga drugas tungod sa nakuhang drug paraphernalia kanila.

Samtang giabsuwelto ang usa ka gidudahang tiggamitan og ginadiling drugas tungod sa kapakyas sa kapolisan sa pagpaubos kaniya sa drug test.

Ang gipakawalay sala ni RTC-7 Branch 13 Judge Meinrado Paredes sa kasong illegal possession of drug paraphernalia mao sila si Babaylonio Tanus, Junrey Calvaro, Christory Garcia ug Jack Garcia pulos taga dakbayan sa Sugbu.

Nasayran nga ang buhatan ni Insp. Enrique Samosa sa Mobile Patrol ang nakadawat og tawag sa usa ka concerned citizen nga may mga armadong mga tawo sa room 413 sa 4th floor sa Hope Pension House sa dalan Manalili.

Si Tanus naaktohan nga may giluklok nga armas sa hawak hinungdan nga nag-abutang usab kini og laing kaso.

 Apan ang kaubanan niya giapil sa pagdakop tungod may mga drug paraphernalia nga nakuha kanila nga may mga lama sa shabu hinungdan nga gipasakaan usab sila og kasong paghupot og drug paraphernalia.

 Apan wala kini hatagi og gibug-aton ni Paredes tungod kay nagdahom lamang nga ang mga dinakpan drug user apan wala gipaubos sa drug test.   (BANAT NEWS)