Kongresista patabangon sa VSMMC

CEBU - Mipasar og resolusyon ang Regional Development Council-7 nga nag-awhag sa mga Kongresista ug mga Senador ug ingon man ang Local Government Unit ug Non-Government Organizations nga mohatag og pundo alang sa Women and Children Protection Unit (WCPU) diha sa Vicente Sotto Memorial Medical Center (VSMMC).

Si Roderic Poca, chairperson sa Development Administration Committee kinsa maoy mipaila sa maong resolusyon atol sa RDC meeting nagkanayon nga ang pundo sa maong sentro kuwang kaayo hinungdan nga maglisod kini sa pagtubag sa mga panginahanglan sa ilang serbisyo.diha sa VSMMC.

Sa usa ka memorandum nga pinitsahan niadtong Pebrero 5, 1997 ang Department of Health (DOH) miluwat og administrative order ug mipahibawo nga dumalahon na sa maong ahensya ang VSMMC ug palambuon ang Women and Children Protection Unit (WCPU) niini.

Sa miting sa miaging Disyembre 10 uban sa Social Development Committee (SDC) gikataho nga ang rason sa kakulang sa pundo sa WCPU mao ang paghinobra sa mga pasyente niini.

Si Poca miingon nga girekomendar na sa iyang komitiba nga ang pundo alang WCPU para sa 2009 kinahanglang maggikan na sa mga Kongresista, Senador, Local Government Unit ug ingon man NGO’s dinhi sa Central Visayas.

Gawas sa idonar nga hinabang sa mga Kongresista, Senador, LGU ug NGO’s modawat usab sila og hinabang sa pribadong sector., matud pa ni Poca.  (BANAT NEWS)