Gibunala'g tubo namatay

CEBU - Nabuak ang ulo sa usa ka construction worker nga napalgang patay ug gituuhang gibunalan og tubo una biyai diha sa ikaduhang andana sa gitrabahong construction site sa AC Cortes Avenue barangay Guizo dakbayan sa Mandaue kagahapon sa buntag.

Ang biktima mao si Juanito Samillon, 54, lumad sa Camugaw lungsod sa Pinamungahan nga stay-in worker sa OIC Construction Company isip karpentero.

Hangtud ning pagsulat sa balita wala pay matumbok nga suspek ang kapolisan sa maong krimen.

Base sa imbestigasyon ni PO2 Romel Lim sa Crime Against Persons (Homicide) sa Mandaue City Police Office nga alas 6:00 kagahapon sa buntag napalgan ang patay’ng lawas sa biktima diha sa ikaduhang andana sa gitukod nga edipisyo.

Matud pa ni Alex Hostol ang timekeeper sa site nga posibleng kagahapon sa kaadlawon nahitabo ang maong krimen tungod kay nakit-an pa nilang buhi si Samillon uban sa mga trabahante nga nanihapon sa milabay’ng gabii.

Dugang pa ni Hostol nga wala siya’y nahinumdumang gikaaway ang biktima diha sa ilang trabahoan tungod kay kini hilumon.

Sa pagkakaron usa ka trabahante sa site ang wala pa makauli gikan milakaw kagahapon sa kaadlawon ug hangtud nga di kini mobalik aron pagpatim-aw sa iyang pagbiya makunsiderar siyang suspek.

Gipasabot hinuon sa kapolisan nga matag dunay mahitabong krimen, bisan kinsa mamahimong isipong suspek hangtud nga maprubaran nga wala silay sala.

Wala pay matumbok nga motibo ang kapolisan sa pagpatay apan base sa samad sa ulo nga nabuak posibleng dunay dakong kalagot ang mamumuno kaniya.

Usa ka tubong may lama sa dugo ang nakit-an di layo sa gikahimutangan sa patay’ng lawas ug gituuhang maoy posibleng gigamit pagbunal sa ulo sa biktima.

Ang anak sa biktima nga si Belinda Samillon mipadayag nga ilang pasakaan og kaso ang mamumuno kun mailhan.  (BANAT NEWS)