Mga opisyal sa Madridejos gipasakaan og kasong civil

CEBU- Mga opisyales sa lungsod sa Madridejos gipasakaan og kasong civil sa usa ka korporasyon tungod sa pagpa-undang sa proyekto nga gipasiugdahan sa nakalabay nga mayor.

Ang gikiha og kasong Damages and Injunction with Temporary Restraining Order mao sila si Madridejos Mayor Salvador dela Fuente ug mga konsehales nga sila si Isaias Bacolod, Delfin Santillan, Bernabe Compra Sr., Ricline Asentista, Randolph Rivera, Doroteo Dorimon ug Cristy James Chavez.

Sumala pa ni Marcial Capitan, tag-iya sa Madridejos Development Inc. sa iyang siyam ka pahinang complaint nga niadtong tuig 1999 si kanhi Mayor Doroteo Salazar ug Marcial Capitan mipirma og Build Operate Transfer (BOT) Concession Agreement human nakadaug sa bidding sa pagtukod sa Kaongkod Port Facility.

Nakagasto na og P17 milyones ang Madridejos Development Inc. sa pagtukod sa Kaongkod Port Facility sa dihang wala na tahura ang kontrata sa paglingkod na ni Mayor Letty Mancio.

Misamot ang maong problema sa dihang milingkod si Mayor Salvador dela Fuente kay giaprobahan ang resolusyon sa konseho nga nagkanselar na hinuon sa maong kontrata niadtong Septiyembre 22, 2008.

Subay niini, gipangayo sa Madridejos Development Inc. ngadto sa korte nga moisyu og TRO ug injunction aron pugngan si Dela Fuente ug konseho sa pagputol sa maong kontrata ug pabayron ang mga opisyales sa maong lungsod og dul-an sa P400 mil nga damages ug tumanon ang BOT Concession Agreement.  (BANAT NEWS)