Tulis sa Talisay misamot og maayo

CEBU – Upat ka tawo ang nabiktima sa tulo ka insidente sa pagpanulis ang nahitabo sa dakbyan sa Talisay niadtong Domingo sa managlahing oras.

Parehong duha ka lalaki kinsa nagsakay og motorsiklo ang giingong nanulis.

Unang insidente nahitabo alas 11 sa buntag sa sitio Uldog, barangay Poblacion sa maong dakbayan kinsa ang biktima mao si Jenelyn dela Cruz, 20, taga sitio Nonoc, barangay Tabunok, samtang naglakaw kini kalit lang gihunongan sa duha ka lalaki nga nagsakay og motorsiklo dayon ang angkas niini mition kaniya og pusil ug dayong ilog sa iyang cellphone nga nagkantidad og P1,200 ug daling misakay og balik sa kauban ug nangikyas.

Mga alas 7:30 sa gabii sa maong adlaw, si Leizel Castillo, 18, residente sa Upper Mohon ang nabiktima usab sa pagpanulis sa usa ka wala mailhing lalaki kinsa nagsakay og motorsiklo.

Nakuha sa maong tulisan ang cellphone nga nagkantidad og P1,900 sa biktima samtang naglingkod kini diha gawas sa ilang balay.

Ang nahisgutang tulisan ang daling mipasutoy sa iyang motorsiklo pahilayo sa lugar human usab sa maong hitabo.

Laing nabiktima sa pagpanulis mao sila si Amelson Quiachon, 19, taga barangay San Isidro ug Marianne Emotin, 23, taga barangay Lagtang ang nabiktima sa pagpanulis sa mga alas 11:35 sa gabii sa maong adlaw.

Ang duha ka biktima ang naglakaw atubangan sa barangay hall sa Tabunok dihang kalit nga usa ka pulang motorsiklo mihunong diha sa ilang atubangan.

Wala na makapalag ang duha dihang gitionan og pusil sa angkas dayon gikuha ang iyang cellphone ug bag ni Emotin nga may sulod nga mga importanteng butang. – BANAT NEWS