1 patay, 6 angol sa Christmas party

CEBU – Usa ka retiradong police ang namatay ug laing unom ang nangaangol human gidaro sa Pajero sa laing reteradong polis atol sa ilang Christmas Party alas 8:15 sa kagabhion niadtong Domingo sulod sa Police Regional Office-7 quadrangle.

Dead-on-arrival sa Chong Hua Hospital si SPO3 Florefino Lapinid, human madagit og nalukot-lukot ilawom sa Mitsubishi Pajero ni Retired Supt.. Benjamin Miaga, 66, presidente sa Cebu Organization of Retired Police Inc.

Samtang ang mga naangol usab mga retiradong police naglangkob nila ni SPO4 Ernesto Pacaña, SPO4 Aristo De Gracia, Col. Edmund Benondo, Patrolman Concordio Castañares, SPO4 Teddy Ariza ug SPO4 Rodulfo Beduya.

Si SPO4 Castañares gikatahong gi-operahan sa kadaot sa iyang ulo sa Cebu Doctors Hospital uban nila ni SPO4 Pacaña, SPO4 De Gracia sa maong tambalanan, samtang sila si Benondo, SPO4 Ariza ug SPO4 Beduya nagpaalim sa Chung Hua Hospital.

Sa report sa PRO-7, si Miaga nagmaneho sa iyang Pajero aron unta kini moatras kay kini padulong na mogawas sa kampo apan kalit lang miarangkada ang sakyanan paatras ug wala na nakontrolar ang manobela hinungdan nga gidaro sa sakyanan ang mga lamesang gihimutangan sa ubang retiradong polis.

Sumala pa nga sa ka kusog sa impact ug padayong pag-atras sa sakyanan nadaro ang mga police apan si Lapinid maoy giingong napasok sa ilawom ug naguroy hangtud nga nadumbol sa duha ka sakyanan nga Kia Picanto nga gipanag-iya ni Feliciano Arriola ug sa Toyota Sedan, gipanag-iyang Florencio Diaz.

Si Sr. Supt. Louie Oppus ang Chief of Regional Operations and Plans Division (PRO-7) nitug-an sa mga tigbalita nga si PRO-7 Chief Ronald Roderos mimando sa lawom nga imbestigasyon labot sa maong insedente.

Kini aron usab masuta ang tinuuray’ng nahitabo didto sa lugar human usab nahibaloan ni Roderos nga matud pa wala kini mananghid sa paggamit sa quadrangle sa pagpahigayon og party ang mga retiradong polis.

Si Miaga nga nahinabi sa mga tigbalita nagkanayon nga iyang giangkon ang sayop ug dili nalang siya mangita pag daghang rason gumikan kay nakasala man gyud siya.

Apan giklaro niini nga dili siya hubog niadtong higayuna apan naka-inom lang gyud.

Matud niya nga automatic transmission sa iyang sakyanan ug gipainit pa niya niadtong tungura ang makina ug wala damhang kalit lang kining miatras.

Samtang si PO3 Anthony Deligero, Chief investigator sa City Traffic Operations Movement (CITOM) nagkanayon nga dili pa sila makapasaka’g kaso batok   kang Miaga hangtud nga walay reklamante. – BANAT NEWS