Usbaw sa suhulan sa munisipyo sa San Fernando supakon sa mayor

CEBU - Resolusyon nga giaprobahan niining bago lang sa konseho sa lungsod sa San Fernando kabahin sa usbaw sa sweldohan sa mga kawani gipaabot nga babagan sa mayor tungod kay matud kini dili makahatag og kaayohan ngadto sa publiko ilabi na sa mga job orders.

Niadtong Disyembre 15, 2008 giaprubahan sa konseho sa San Fernando ang resolusyon numero 301 alang sa Appropriation Ordinance No. 03-2008.

Ang maong ordinansa sa konseho mahitungod sa P2.8 milyones nga pundo alang sa dugang nga 10 porsiyentong usbaw sa suholan sa tanang municipal elected officials, department heads, regular employees ug casuals nga magsugod niadtong Hulyo 1, 2008 nga mokabat ngadto sa P360,081.36.

Dugang appropriation alang sa year-end bonus differentials alang sa tanang municipal officials and employees, terminal pay alang sa mga miretiro nga local civil registrar nga mokabat og P24,238.

Dugang benefit/extra cash gift sa elected officials nga P45 mil, department heads, P40 mil, regular employees, P20 mil ug P3 mil sa casual.

Si Lakambini Reluya, mayor sa maong lungsod sa pakighinabi niini sa mga tigbalita misupak niini ug naglaraw nga i-veto ang maong ordinansa bisan ma-override kini sa konseho.

Gibutyag sa mayor nga sa milabay'ng adlaw lang niya nadawat ang kopya sa nahisgutang ordinansa ug mihulagway nga sobra kaayo ang maong appropriations sa salapi alang sa usa ka munisipalidad ilabi na sa tag P45 mil nga cash gift alang sa mga elected officials samtang ang dakbayan sama sa Carcar ang P30 mil lang ang gipanghatag.

Si Reluya nagkanayon nga ikonsulta niya kini sa Commission on Audit, misugyot hinuon kining across the board ang usbaw aron maapil ang job orders sa cash gifts.

Gipaabot nga dunay mainitong lantugi ang buhatan sa mayor ug sa konseho tungod niini gumikan kay si Reluya gikan sa oposisyon ug walay kaalyado sa konseho sa nahisgutang lungsod. – BANAT NEWS