CEBU - Gibalhog sa bilanggoan ang usa ka 19-anyos nga lalaki kinsa gidakop human pasanginling maoy suspek sa pagpamusil sulod sa internet café ug mipusil sa laing 19- anyos nga batan-on nga giingong sakop sa Alpha Kappa Rho Fraternity sa miaging kaadlawon sa dalan A.C. Cortes Avenue sa barangay Alang-Alang, dakbayan sa Mandaue.
Si SPO1 Lino Baylosis nga nahinabi sa Banat News miila sa suspetsado nga si Dennis Perales, taga Alang-Alang sa maong dakbayan.
Si Perales maoy gitumbok nga mipusil-patay kang Arjune Lamberte, nga iyaha rang silingan.
Matud pa ni Baylosis nga didto sa sulod si Lamberte sa usa ka internet café dihang kalit lang gisulod sa suspek ug gipusil.
Ang biktima daling gihatod sa Mandaue City District Hospital apan gideklarar kining dead on arrival.
Si Baylosis miingon nga misuway unta og ikyas ang suspek apan nadakpan kini sa gwardiya sa maong establisamento ug gi-turn-over ngadto sa kapolisan. – BANAT NEWS