PDEA agent 'nanulis' sa Mandaue, gika-alarma

CEBU - Naalarma si Konsehal Raul Alcoseba human sa nahitabong tulis diha sa dakbayan sa Mandaue niadtong miaging semana nga nagpailang mga ahente sa Philippine Drug Enforcement Agency (PDEA) ang misulod sa panimalay sa usa ka negosyante diha sa maong siyudad.

Apan ang tigpamaba sa PDEA-7 nga si Jessie Tabanao sa pakighinabi sa Banat News mihimakak nga may operasyon sila nianang adlawa sanglit nag-Christmas party sa Oslob silang tanan.

Dunay himuong imbestigasyon ang PDEA-7 kabahin sa maong insidente aron pagtino sa tinuuray nga nahitabo.

Nasakiyo sa mga suspetsado ang salaping cash, tseke ug mga alahas sulod sa panimalay ni Edwin Cortes nga mokantidad og P2.1 milyones.

Matud ni Alcoseba nga ang maong matang sa modus operandi gihimo sa mga tulisan didto sa kauluhan apan kini niabot na dinhi sa Sugbu hinungdan nga siya nabalaka.

Ang konsehal nga maoy vice chairman sa Committee on Public Order and Safety sa City Council nagtuo hinuon nga masikop ra ang mga tulisan apan kinahanglang magmatngon ang mga Sugbuanon niining hitaboa.  

“Awhagon nato ang atong mga kaigsoonan nga dili gyud magpataka og pasulod sa mga tawo nga wala nila ilhi, walay koordinasyon sa barangay o sa local police,” sumala ni Alcoseba.

Sa pikas bahin gipahibawo sa vice chairman sa Dangerous Drugs Board (DDB), Paul Clarence Oaminal, nga susihon sa mga PDEA agents ang maong insidente.

 “Ga-implemintar man kaha to og search warrant, mahimo ba gud na og duha lang ka tawo unya nag-motor lang?” nangutana si Oaminal.

Buot sa DDB vice chairman nga maila ang mga tulisan pinaagi usab sa pagkuha og personal description niini gikan mismo sa biktima ug sa mga saksi.

Sama kang Alcoseba si Oaminal mipahimangno usab sa publiko sa angayan nga buhaton kung makasugat sa maong matang sa modus operandi. – BANAT NEWS