Koreana Mireklamo gipang wartahan

Cebu - Nipasaka og kaso sa piskalya ang usa ka Koreana human siya giingong gipangwartahan sa inahan sa bata nga iyang nadasmagan.

Si Kim Yong Sik kasamtangang nagpuyo sa Basdiot Panagsama, Moalboal nipasaka og kasong pagpangawat ug ingon man pagpanghulga batok kang Rhea Alvarado nga taga Biasong, Dakit, lungsod sa Barili.

Sumala pa ni Kim nga niadtong nakalabay nga bulan nadasmagan sa iyang motor ang 4-anyos nga anak ni Alvarado ug gipadala kini sa usa ka pribadong tambalanan sa siyudad sa Sugbu.

Gikatahong gipugos siya sa pagpadeposito og P50 mil   hinungdan nga gipabalhin kini sa publikong hospital apan gipadeposito gihapon siya og P20 mil.

 Human makagawas ang bata sa tambalanan, iyang gipaningil si Alvarado sa P16 mil nga sobra sa iyang nadeposito tungod kay P3, 187 lamang ang nagasto sa pagpatambal sa bata.

Pero inay nga mohatag kini sa sobra sa nagasto, gipadad-an na hinuon si Kim og demanda ni Alvarado nga mobayad og P100 ka libo ka pesos aron dili ipadayon ang pagpa-impound sa iyang motor didto sa Barili Police station.

Aron mabawi niya ang kaso ug maundang ang pagpangayo og kwarta sa maong inahan, si Kim nipasaka sa maong kaso aron mabalik ang iyang salapi. – BANAT NEWS