Cebu - Tulo ka nagpailang mga sakop sa Philippine Drug Enforcement Agency mitulis sa usa ka negosyante ug misakiyo sa gibana-banang P2.1 milyones ka pesos human nila gisaka ang panimalay sa biktima diha sa Upper Tabok sa barangay Tabok dakbayan sa Mandaue sa milabay’ng hapon.
Ang biktima mao si Edwin Cortes, 48, minyo ug residente sa maong dapit usa kini ka negosyante.
Sa pasiunang imbestigasyon sa Crime Against Property kon (kanhi TRS) sa MCPO nasayran nga mga 1:30 sa milabay’ng hapon kalit nga miabot ang tulo ka mga batan-on sa panimalay ni Cortes ug nagpaila nga mga sakop sa PDEA -7.
Atol sa ilang panag-estorya kalit nga gitionan si Cortes sa usa sa mga tulisan ug ang usa maoy midiretso sa lawak sa biktima dayong kuha sa usa ka itom nga bag nga gisudlan sa P1.7 milyones cash nga alang sa mga sakop sa kooperatibang iyang gihuptan.
Si SPO4 Arreston Bataluna sa Investigation Division and Management Bureau (IDMB) ug Theft and Robbery section (TRS) sa Mandaue City Police Office (MCPO) miingon nga gisugat og sumbohan sa armas ang biktima.
Gawas sa maong kwarta nakuha usab ang mga alahas niini nga mobalor P400 mil; tseke nga nagkantidad og P12 mil ug tulo ka mga cellular phones.
Human makuha ang ilang tuyo daling miikyas palayo ang tulo sakay sa usa ka Skygo kolor blue nga motorsiklong gimaneho sa laing kauban sa mga suspek.
Ang grupo ni Sr. Insp. Gregorio Aniñon maoy miresponde ug misuway pagpangita sa mga tulisan apan wala na nila kini maabti.
Gibanabana ni Cortes nga nagpangidaron sa 20-anyos pataas ang mga tulisan.
Hangtod ning pagbalita padayon pa ang gihimong imbestigasyon sa MCPO aron sa pag-ila sa mga responsable. – BANAT NEWS