Suporta ni Ruiz ug mga kongresista gihangop

Cebu - Gikalipay ni Cordova Mayor Adelino Sitoy ang paspas nga lakang sa kongreso sa pagkombirtir sa Cordova College ngadto na sa pagka-State College.

Matud ni Sitoy nga dako kaayo og ikatabang si 6th District Rep. Nerissa Soon-Ruiz sa paglambo sa Cordova College kun ugaling mamahimo na kining usa ka State College.

Kini sama sa paggahin og pundo alang sa paghimo og dugang lawak saringan ug ang pagpataas sa suholan sa mga magtutudlo.

Sa milabay’ng hapon si Ruiz mipadayag sa mga sakop sa media nga naaprubahan na sa ikaduhang pagbasa sa Kamara de Representante ang iyang proposed bill nga himuong state college ang Cordova College.

Ang proposed bill gigahinan sa committee on appropriation og P20 milyones alang niini.

Gipasalamatan usab ni Ruiz sila si 4th District Rep. Benhur Salimbangon ug 1st District Rep. Eduardo Gullas sa hugot nilang pagsuporta sa maong bill.

Nanghinaut si Ruiz nga human sa Committee on Rules diin tukion ang dugang pang mga legal nga lagda sa maong bill ug sa pagbalik niini ngadto sa Kamara kini maaprubahan sa ikatulong pagbasa.

Gikan didto ihatud kini ngadto sa Senado aron mahingpit na nga balaud.

Ang Cordova College ilawom sa programa sa mga opisyales sa Cordova ug ingon man ni Ruiz. – BANAT NEWS