Cebu - Nagpabiling normal ang operasyon sa munisipyo sa lungsod sa Tudela isla sa Camotes kagahapong adlawa bisan pa sa nitumaw nga tensyon sa milabay’ng kaadlawon human gisulong ni Mayor Rogelio Baquerfo ug sa 30 ka mga supporters niini ang munisipyo sa lungsod aron mo-take-over hulip kang mayor Demetrio Granada nga maoy kasamtangang nagdumala sa balay lungsod.
Hinuon gibutyag ni Granada dihang nahinabi sa Banat News nga dinhi siya sa dakbayan sa Sugbu atol sa pagsulong ug nianang pagkabuntag dayun nisirit siya og larga pauli sa ilang lugar ug tibuok adlaw kagahapon nag-opisina sa munisipyo.
Matud ni Granada nga bisan pa sa maong tensyon nagpabilin nga normal ang ilang operasyon sa mga kawani tungod kay padayun nilang girespeto ang ilang gipirmahan nga kasabutan atubangan ni Gobernador Gwendolyn Garcia.
Ang duha milagdang likayan ang pagmugna og kagubot samtang magpaabot sila sa hukom sa kaso nila kabahin sa kung si kinsay midaog sa milabay’ng piniliay.
Matud ni Granada gipasaligan niya ang hepe sa kapulisan Insp. Ramon Villar nga dili gyud sila mohimo og lakang nga makapasamot sa kagubot apan nanganti nga dili sila motalaw ug moatras kun sila maoy hilabtan.
Gitug-an sab ni Granada nga kagahapong adlawa gi-asikaso sab niya ang planong Christmas party sa mga kawani sa lungsod karung Lunes sunod semana.
Samtang si Villar mibutyag nga nakatabang pagpabugnaw sa sitwasyon ang pagbunok sa kusog nga uwan kagahapon.
Sa pagkakaron nagpabilin si Granada ug mga supporter niini maoy nag-okupar sa munisipyo samtang si Baquerfo ug ang mga supporter niini anaa sa pikas edipisyo sa karaang munisipyo dili layo sa bag-ong municipal hall.
Si Cebu Provincial Police Office director Sr. Supt. Carmelo Valmoria nagkanayon nga milurang na ang tensyon sa maong lungsod ug mihulagway nga “back to business” na ang munisipyo.