Cebu - Lain na usab nga giingong big time drug pusher sa Emita ang naabsuwelto sa kasong paghupot og ginadiling drugas.
Si RTC-7 Judge Raphael Yrastorza nibasura sa kasong paghupot sa ginadiling drugas batok kang Eslie Cellan nga taga barangay Ermita ning siyudad sa Sugbu gumikan sa depektosong proseso sa operasyon sa kapolisan.
Nasayran nga si Cellan nakuhaan og walo ka mga paketeng shabu nga nitimbang og 26.94 ka gramos dihang gironda sa mga elemento sa nabungkag na nga Vice Control Section sa Cebu City Police Office nga kanhi gipangulohan ni Chief Inspector Marvin Sanchez, ang balay niini sa Ermita niadtong bulan sa Disyembre sa nakalabay nga tuig.
Sigun pa sa mga polis diha mismo si Cellan sa maong ronda hinungdan nga kini gisikop ug gipasakaan og kaso sa korte.
Apan mas gituohan ni Judge Yrastorza ang testimonya ni Cellan nga gisuportahan og medical certificate nga usa ka adlaw sa wala pa ang maong ronda na hospital siya sa Chung Hua Hospital tungod sa buak nga gusok.
Ang korte nimando sa pagkanselar ug pag-uli sa cash bond ni Cellan samtang gimando usab niini ang pagguba sa maong ebidensiya. – BANAT NEWS