Pito angol sa bangga

Cebu - Pito ka tawo ang nangaangol human magsungag ang usa ka minibus ug usa ka trak diha sa National Highway sa barangay Dawis-Norte lungsod sa Carmen kagahapon sa buntag.

Sa imbestigasyon sa kapolisan nagbiyahe padulong sa Sugbo ang minibus nga nagtangag og plakang GWE-511 ug gimaneho ni Ronnie Hingco, 30, taga Tabogon.

Apan sa pag-abot sa maong lugar usa ka 10-wheeler truck kansang drayber daling miikyas human sa hitabo ang misungag sa maong pasaheroan.

Si Hingco nakabaton og bun-og ug bali sa tuong bahin sa paa samtang nangaangol ang iyang mga pasaherong sila si Rick Yballe, 28 anyos, Rodolfo Brandares, 50; Leo Brandares, 50; Jassy Halpon, 8 ; pulos taga Sogod; Polimar Samblacenio, 50 ug ang 8-anyos nga si Jessica Samblacenio taga Tabogon.

Ang mga biktima daling gidala sa Danao District Hospital samtang ang mga grabeng nangaangol gibalhin ngadto sa syudad sa Sugbu. – BANAT NEWS