PRO-7 heightened alert tungod sa twin Iligan City bombing

Cebu - Gibutang sa heightened alert ang kapolisan sa rehiyon sugod niadtong milabay’ng adlaw human mahitabo ang pagpamomba sa duha ka mga malls sa Iligan City.

Gipasalig hinuon ni Police Regional Office (PRO-7) Chief Supt. Ronald Roderos sa publiko nga dili mahitabo dinhi sa Sugbu ang nahitabo sa Gaisano Mall sa Iligan City diin duha ka tawo ang namatay ug dul-an sa 30 ang nangaangol.

Matud pa ni Roderos nga wala silay nadawat nga report nga adunay hulga nga specific threat sa Sugbu apan wala molimod ang hulga nagpabilin sa bisan asang parte sa nasud.

Gipalihok na karon sa kapolisan ug militar ang tagsa-tagsa nila ka mga intelligence units aron kapugngan ang susamang hitabo didto sa Iligan City dinhi.

Sukad pa niadtong Disyembre 15 kutob sa Enero 10 gialerto na ang kapolisan nunot sa umaabot nga kapaskuhan.

Lakip sa gipangandaman mao ang anibersaryo sa katukoran sa Communist Party of the Philippines-New Peoples Army karong Disyembre 26 ug ang paghinumdom sa Rizal Day Bombing karong Disyembre 30.

Samtang ang hepe sa kapulisan sa dakbayan sa Sugbu, Sr. Supt. Patrocinio Comendador mibutyag nga wala pa mahitabo ang bombing didto sa Iligan City nakadawat na sila’g report sa intelligence nga adunay pagpamomba nga mahitabo apan wala sila masayod kun asa ang specific target.

Matud pa ni Comendador nga gidoble na karon nila ang ilang pagbantay sa nagkadaiyang dapit sa dakbayan. – BANAT NEWS