Cebu - Pormal nga gibuksan kagahapong adlawa ang “Red Christmas Bazaar” nga gipahimutang atubangan sa cultural stage kilid sa Danao Civic Center. Programa kini ni Kongresista Ramon Red Durano VI sa ikalimang distrito sa lalawigan sa Sugbu nga gisalmutan sa mga gagmay’ng negosyante gikan sa nagkalain-laing lungsod nga sakop sa iyang distrito.
Si Durano nga nahinabi sa mga tigbalita kagahapon nagkanayon nga wala gyud siya magdahum nga daghan ang misalmot sa mao niyang programa ug gihulagway niya nga nagmalampuson kini.
Matud sa kongresista iyang gituyo ang maong programa aron mailhan ang mga produkto nga ginama lang diha sa iyang distrito ug madugangan ang income sa mga residente.
Ang Department of Trade and Industry (DTI)-7 maoy miabag sa maong programa diin ang mga manghimoay og mga produkto diha sa ikalimang distrito lakip na kadtong namaligya og pagkaon gipaubos una sa duha ka adlaw’ng seminar niadtong Nobiyembre 21 ug 22.
Atol sa seminar gitudloan sa DTI kabahin sa product development ug ingon man packaging ug uban pa kun unsaon sa mga negosyante pagpreparar ang ilang produkto.
Ang bazaar motapos karong adlaw’ng Domingo ug matag gabii adunay pasundayag sa stage kilid sa Danao Civic Center sama sa concert, singing contest nga girepresentahan sa 11 ka lungsod nga sakop sa ikalimang distrito kinsa anaa ang mga produkto gipang-display usab.
Duna usab silay food fair matag gabii, matud pang Durano.
Matag gabii, pangayoan usab ang mga negosyante og output sa ilang gipamaligya nga produkto kun unsa nga klase ang kusog mahalin aron maoy ilang pangitaan og pamaagi nga molambo ang produkto.
Matud ni Durano human unya sa upat ka adlaw nga bazaar iyang estoryahon ang mga negosyante aron iyang pangayoan usab og mga sugyot.
Gitug-an sa kongresista sa maong programa gigahinan niya og P150 mil nga pundo apan tungod sa mga sponsors usa niini ang The Freeman ug San Miguel Corporation, migasto na lang siya og katunga.
Nagplano karon ang kongresista nga matag tuig na himuon ang Christmas bazaar tungod kay dako iyang pagtuo nga mas modaghan pa unya sa mga negosyante sa iyang distrito ang mosalmot sa sunod nga katuigan sanglit iyang gitataw nga ang uban sa pagkakaron nagpaniid lang una.
Gitumong kining maong programa nga magsingabot ang Pasko gumikan kay matud ni Durano ang mga tawo makadawat og bunos ug mamalit gyud kini og regalo sa ilang minahal sa kinabuhi. – BANAT NEWS