Cebu - Gikombikto sa korte ang usa ka houseboy sa kasong pagpanglugos human namatud-i nga sad-an sa pag-finger sa 5-anyos nga tinun-an sa kinder garten school sa dakbayan sa Talisay.
Si RTC-7 branch 14 Judge Raphael Yrastorza nipahamtang og silot ngadto kang John Rey Villanueva, houseboy sa usa ka iladong pamilya sa barangay Dawis dakbayan sa Talisay.
Kini gisilutan pagkabilanggo gikan sa unom ka bulan ngadto sa unom ka tuig ug pabayron og P25 mil nga civil liability ug laing P25 mil pesos nga moral damages.
Nasayran nga niadong Disyembre 6, 2006, pasado alas 8:00 ang takna sa buntag ang 5-anyos nga biktima miadto sa balay sa classmate niini kay walay klase ug niadtong higayona nagbinugtong kini sa pagtan-aw og salidang cartoons sa television.
Kalit lamang nga nitungha ang suspetsado ug nilingkod sa sala nga diin siya nahimutang, si Villanueva nimando sa biktima sa pagpaduol kaniya apan dihang niduol na ang biktima gisabak kini sa paa ug gimanduan sa paghimashimas sa iyang kinatawo.
Dihang nibalibad ang biktima, si Villanueva nihubo sa pajama ug panty sa bata ug gisulod ang tudlo niini ngadto sa kinatawo sa bata.
Misuway unta ang bata, sa pagsiyagit apan gitabunan sa suspek ang iyang baba, diha lang mihunong ang suspek dihang miabot ang mga tagbalay.
Si Judge Yrastorza wala motuo sa mga pangulipas sa suspetsado tungod kay wala mausab ang mga pamahayag sa biktima sa korte. – BANAT NEWS