VK ug moli-moli gipangguba

Cebu - Kapin sa usa ka gatos ka mga video karera ug moli-moli machine ang gipangbungkag ug gipangdugmok kagahapong adlawa sa Cebu City Hall.

Ang 103 ka mga kahimanan sa illegal nga sugal nasakmit sa kapulisan gikan sa nagkadaiyang kabarangayan sa dakbayan gikan sa Ermita, Pasil, Suba, Duljo-Fatima, ug barangay Kamagayan nga bag-o lang usab nga gironda sa kapulisan.

Matud ni Felix Jose Lazarte nga ang mga sensiyo nga nakuha sa mga makina adto ihatag ngadto sa mga charitable institutions sa siyudad sama sa Cebu City Task Force on Street Children ingon man sa Children of Cebu Foundation nga gipanguluhan sa unang ginang sa siyudad nga si Margot Osmeña.

Gipahibawo ni Lazarte nga labihan ang pagminos karon sa maong matang sa mga sugal sa dakbayan tungod sa hugot nga kampanya sa kapulisan.

Agi’g pagmatuod niini niingon si Lazarte nga pipila na lang ang masakmit sa kapulisan matag higayon nga kini mopahigayon og operasyon.

Gani niingon si Lazarte nga sukad sa buwan sa Enero niining tuiga, makatulo na lang sila makaguba sa maong mga makina ang dakbayan.    Niadtong miaging buwan sa Pebrero, 82 ka video carrera ug moli-moli machine ang gipangbungkag sa atubangang bahin sa City Hall.

Samtang niadtong miaging buwan sa Hulyo, laing 105 usab ka video karera ug moli-moli machine ang gipangdugmok.   

“Makita man nimo nga hugot gyud ang atong kampanya batok sa illegal gambling mao nga ang mga operator nihinay pud ang ilang production,” sumala ni Lazarte. – BANAT NEWS