BOPK nangita na'g mag-konsehal

Cebu - Nagsugod na og pangita ang Bando Osmeña Pundok Kauswagan (BOPK) og kandidato alang sa pagka-konsehal sa siyudad sa Sugbu tungod kay lima ka mga konsehal karon ang anaa na sa ikatulo ug katapusang termino.

Gawas kang Konsehal Sylvan Jakosalem, last termer usab sila si Konsehal Christopher Alix ug Konsehal Nestor Archival sa amihanang distrito.

Samtang sa habagatang distrito sa dakbayan, sila usab si Konsehal Gerardo Carillo ug Konsehal Arsenio Pacaña maoy motapos sa ilang termino.

Matud ni Jakosalem nga dili problema ang pagpangita og mga kandidato sa south district tungod kay giingong dunay pipila ka kanhi konsehal nga nagpabiling aktibo hangtod karon.

Pipila sa gipasabot ni Jakosalem mao sila si Konsehal Joy Pesquera ug Konsehal Procopio Fernandez nga gikuhang mga consultant sa kagamhanan sa dakbayan.

Apan sumala sa konsehal nga lahi ang sitwasyon sa north district tungod kay tulo sila ang dili na mahimong magpasubli ug kinahanglang hulipan.

Gipadayag hinuon ni Jakosalem nga iyang isugyot nga si kanhi Konsehal Manuel Legaspi maoy ihulip kaniya sa 2010 elections.

“Abogado man si Maning unya aktibo usab sa mga kalihukan sa city government, miagi na sab siya pagka- konsehal sa siyudad,” sumala ni Jakosalem.

Sa pikas bahin, isugyot usab sa konsehal sa ilang grupo nga sama kaniya nga nagtrabaho sa media malakip sa line-up sa BOPK sa umaabot nga piniliay.

Nagdumili hinuon si Jakosalem pagbutyag kung kini duna nay nakit-ang nagtrabaho sa Media nga angayang mahisakop sa ilang grupo.

“Daghan man diha nga qualified, mas maayo nang naa sa Media kay nahibalo na sila kung unsay among trabaho ug duna nay experience sa pagserbisyo,” matud sa konsehal.

Gawas sa ihulip sa lima ka mga last termer nga mga konsehal, padayon usab karong nanghashas ang BOPK sa kandidato niini pagka-kongresista sa south district. – BANAT NEWS