Traffic clock ipatuman

Cebu - Gitinguha karon ni Cebu City Acting Mayor Michael Rama nga mamugna ang traffic clock sa siyudad subay usab sa gitinguhang himoon niini nga paradigm shift.

Ang acting mayor gitakdang makigtagbo kang Citom Executive Director Arnel Tancinco aron sa pagplantsa sa hulmahong traffic clock.

Gipasabot ni Rama nga pinaagi sa traffic clock dali ra nga mahibaw-an kung asang dapita sa dakbayan ug unsang orasa ang dunay daghang mangagi nga sakyanan aron nga kapangitaan dayon og paagi sa pagsulbad sa maong problema.

Kini pinaagi sa pagpadala og ubay-ubay nga mga personnel dili lang sa mga traffic enforcer kundili lakip na usab sa ubang law enforcement unit.

Ang tumong niini mao ang pagpatunhay sa dagan sa trapiko sa usa ka dapit diin sagad maghuot ang mga sakyanan ilabi na panahon sa rush hours.

Wala pa hinoon matino kung kanus-a pakigtagboan sa acting mayor si Tancinco ingon man sa pagmugna sa traffic clock.

Sa pikas bahin gusto usab sa acting mayor nga mutabang ang kapulisan sa mga traffic enforcer pagpatunhay sa dagan sa trapiko sa siyudad.

Kini tungod kay naobserbahan ni Rama nga dunay mga pedestrian ug mga driver nga dili morespito sa presensya sa mga traffic enforcer.

Gusto sa acting mayor nga ang mga polis mutabang sa pagdisiplina niadtong mga malapason sa mga lagda sa trapiko dinhi sa dakbayan. – BANAT NEWS