Cebu - Kasong kriminal ug administratiba gisang-at sa kapitan sa San Fernando batok sa ilang mayor tungod sa mga computer ug libro nga gidonar gikan sa gawas sa nasud.
Ang gikiha ni Barangay Sangat Kapitan Conigunda Enriquez sa Office of the Ombudsman-Visayas mao si Mayor Lakambini Reluya tungod sa kontrobersiyal nga mga computer ug libro nga hinatag gikan sa gawas sa nasud alang unta sa Sangat National High School.
Ang maong mga donasyon nga sulod sa tulo ka mga 40-footer container van gikan sa Estados Unidos gikatahong gipa-deliver ni Reluya sa munisipyo apan wala dayon ipahibalo ang mga beneficiary unta niini.
Apan matud sa reklamo nga gipatawag ang prinsipal sa tunghaan nga si Glenna Plarisan mahitungod sa pag-abot sa maong donasyon sa dihang migawas na sa media ang gibuhat sa mayor.
Human sa pipila ka semana, gipakarga sa mayor ang mga donasyon sa mga dumptruck ug gitambak sa Sangat National High School.
Sumala pa nga nasagmuyo ang mga titser ug tinun-an sa tunghaan sa gibuhat sa mayor. Adunay mga hulagway sa maong pagdam-ok sa mga computer ug libro nga na-post sa internet sa mga tinun-an sa www.tagasan-fernando.blogspot.com.
Si Enriquez misang-at sa kaso batok ni Reluya tungod sa paglapas niini sa Akta Republika 3019 kon Anti-Graft and Corrupt Practices Act, samtang nakahimo kini og grave misconduct ug dishonesty tungod sa kontrobersiya.
Gihangyo sa kapitana ang Ombudsman alang sa dinaliang imbestigasyon sa ilang gipasakang reklamo ug kun masuta ang kalapasan sa mayor, ipasaka gilayon kini sa Sandiganbayan o kaha sa korte.
“I further respectfully pray that pending investigation of this case in order not to give undue advantage to respondent Municipal Mayor to influence the witnesses, the said respondent be preventively suspended from office,” matud ni Enriquez sa gisang-at nga reklamo.
Gitumbok sa kapitana nga si Reluya nasayod nga ang mga ginamit nga libro ug computer nga gidonar ni Raquel Enad, kanhi residente sa Sangat, apan molupyo na karon sa Estados Unidos, alang gyud sa Sangat National High School.
Nalatid sa deed of donation, bill lading ug sa ubang mga dokumento nga giisyu sa Philippine Consulate sa California nga ang maong mga computer ug libro alang sa Sangat.
“It is clear therefore, the illegal act of respondent Mayor has caused injury not only to the Sangat National High School but also to hundreds of its students,” ang reklamo ni Enriquez nagkanayon.
Si Enriquez mitataw nga nagpatabang kaniya ang mga magtutudlo sa Sangat tungod sa hitabo hinungdan nga siya ang midangop sa Ombudsman. – BANAT NEWS