Cebu - Ang mga sakop sa Squatters Prevention Encroachment Elimination Division (Speed) modemolis na usab ugma sa buntag sa mga tindahan og mga imahen sa Basilica del Sto. Niño diha sa eskina D. Jakosalem ug Osmeña Blvd.
Si Major Vicente Mercado nga maoy hepe sa SPEED namahayag nga ang ilang pagahimuon ugma maoy agi og pagtuman sa kamandoan ni Acting Cebu City Mayor Michael Rama.
Dunay mga vendors nga nahinangop sa maong lakang aron mahawan ang maong dapit ug sila makahangyo nga kun tugotan man sa City Hall nga makabalik sa pagpaninda ang mga tigbaligya og imahen, kahatagan sila og luna.
Si Merlinda "Inday" Batiller, igsuon sa presidente sa Sto. Niño Sidewalk Vendors Association, mipasangil sa iyang maguwang nga bentahosa kay miangkon og dako nga puwesto samtang wala ang uban sa iyang mga sakop.
Si Batiller mibutyag usab nga ang iyang maguwang duna nay pwesto didto sa kongkretong stalls nga gimugna sa Young Builders Corporation sa dalan D. Jakosalem apan buot lang gihapon nga moangkon og pwesto sa dapit sa eskina.
Matud ni Major Mercado nga kadtong mga tindahan nga magpabilin sa maong dapit ugma sa buntag ilang gub-on ug ipangkarga ang kagamitan aron dad-on sa ilang buhatan.
Tinguha gyod ni Mercado mao ang pagpatuman og estrikto nga paagi diin ang mga baligya niadtong mga tindera nga gihulagway niyang "gahi'g ulo" dili na iuli kon kini masakmit. – BANAT NEWS