Duha ka sakop sa gang gikasuhan

Cebu - Hingpit nang napasakaan og kaso ngadto sa korte ang duha ka menor de edad nga gitumbok sa kapolisan nga gipasanginlang hitmen sa grupong Bloods dinhi sa siyudad sa Sugbu.

Kasong illegal possession of firearms ang gipasaka batok sa duha kinsa nangakuhaan og usa ka .357 revolver ug usa ka .22 kalibreng revolver nga walay mga dokumento.

Ang duha nasikop sa gibutang nga checkpoint niadtong nakalabay nga kaadlawon sa dalan D. Jakosalem St. sa dakbayan sa mga sakop sa Task Force Motorista.

Sumala pa sa mga polis ang duha nagpakita og kadudahang lihok hinungdan nga ilaha kining gipangrekisa ug diha na masakping may armas ang duha.

Matud pa ni PO3 Luisito Naval nga usa sa duha ka batan-on maoy gitumbok nga hitman sa Bloods sa barangay Pari-an ning siyudad.

Bisan sila mga menor de edad, gumikan sa pagka- notado na nila sa nagkadaiyang krimen ila gyud kining gipasakaan og kaso. – BANAT NEWS