Dili mominos sa 10 ka mga konkretong panimalay nga nahimutang duol sa baybayon nangaguba ug duna pay usa ka payag ang naanod ug duha ka pumpboat ang nabuak sa dihang gibanlas sa seawall sa nahitabong “tidal wave” diin ang mga dagkung bawod miigo sa barangay Antipolo lungsod sa Tuburan niadtong Domingo sa gabii.
Gibanabana nga mokabat sa P300 ngadto sa P400 mil ang kinatibuk-ang kadaot nga gibilin sa mga nangaguba nga panimalay sa maong lugar mugna sa tidal wave apan wala hinuoy gika-report nga na-angol o nakalas human nakabantay ug nakagawas dayun sa ilang tagsa tagsa ka mga panimalay ang mga residente.
Ang barangay kapitan mismo sa barangay nga si Kapitan David Arnaiz Jr. nga apil sa mga apektado, mikonpirmar sa dihang nahinabi sa Banat News nga paingon na unta silang mangatulog sa dihang nabati nila ang nagdahunog nga dagkung mga bawod sa mga alas 10 sa gabii hangtud sa pagka alas 11.
Nasayran usab gikan ni Kagawad Edmund Toto Maglasang apil sa nagub-an og panimalay sa dihang nahinabi sa Banat News nga sa 10 ka mga panimalay nga nangaguba usa niini ang totally damage nga gipanag-iya sa usa ka Roque Pitalona human nabali ang haligi nga semento tungod sa pagkankan sa mga dagkong bawod sa flooring niini.
Matud ni Maglasang gikan sa Sitio Suba hangtud sa Antipolo Proper nga dunay dos kilometros ang gitas-on ang apektado sa maong pag-igo sa mga dagkong bawod nga gihulagway sa mga nakasaksi nga halos motupong sa panimalay ang gidak-on niini.
Ang mga panimalay nga nangaguba gipanag-iya nila ni Zaldy Tiballa, Alwin Payda ang nanag-iya sa gi-anod nga balay dala ang ilang mga gamit og senina, Gorio Barongo, Gomie Nelaguda, Roque Pitaluna, Ben Montellano, David Arnaiz Sr, amahan sa kapitan, Arturo Mahusa, Ruben Even, Kagawad Edmund Maglasang ug apil ang panimalay ni kapitan Arnaiz.
Samtang maayong pagkabuak sa duha ka pumpboat nga gipanag-iya sa nailang sila si Barongo ug Nilaguda nga gibanlas paingon sa seawall sa dagkong bawod.
Dunay dili mominos 200 ka mga panimalay nga nahimutang sa maong lugar apil na ang pinuy-anan sa kapitan ug ni kagawad Maglasang apan sagad niini nakaangkon lang og mga ginagmay’ng kadaot sama sa pagkadaot sa flooring nga gikankan gawas lang sa 10 ka mga panimalay nga nangaguba human mabuslot gyud ang semento nga bongbong niini nga nag-atubang sa dagat nga gidasmagan sa mga dagkong bawod.
Hinuon, namatikdan ni Maglasang nga nilanat lang ngadto sa 10 minutos ang gidugayun sa mga dagko kaayong bawod nga miigo ug maoy nakaguba sa mga bongbong nga semento sa mga panimalay gawas lang sa dili kaayo dagko nga bawod nga nagpadayon hangtud sa usa ka oras una pa nawala.
Gitug-an ni Arnaiz nga apil sa naguba nga mga balay mao ang pinuy-anan sa iyang amahan nga si David Arnaiz Sr. nga nakaangkon usab og dakung kadaut.
Nunot niini, gitakdang magpatawag og emergency meeting si kapitan Arnaiz sa konseho kagabii aron sabut sabutan ang paghimo og lakang pagtubag sa maong problema sama sa posibleng pag-deklarar ubos sa state of calamity sa mga apektadong lugar.