Amahang mimolestiya sa anak gikonbikto

Gikonbikto sa korte ang usa ka amahan nga midagmal ug mimolestiya sa iyang menor de edad nga anak nga gigamitan niya sa iyang tiil.

Si RTC-7 Branch 14 Judge Raphael Yrastorza Sr. nikonbikto kang Loretro Alferez nga taga Tungkop, Minglanilla sa kasong acts of lasciviousness ug gisilotan kining mabilanggo gikan sa upat ngadto sa unom ka tuig nga pagkabilanggo.

 Gawas sa pagkabilanggo pamultahon pa gyud si Alferez P25 mil nga civil liabilities ug P20 mil   nga moral damages.

 Si Judge Yrastorza nihatag og gibug-aton sa pamahayag ug testimonya sa biktima tungod kay wala gyud kini matuis sa pag- cross examine sa abogado sa akusado.

 Nasayran nga niadtong Septembre tuig 2005 ang amahan migamit sa iyang tiil sa paghikap sa dughan sa biktima samtang kini nakatulog.

Napun-an kini atol sa fiesta sa ilang lugar sa sama gihapong bulan diin gihikap na gyud niini sa duha ka kamot ang dughan sa anak.

Ang bata mireklamo ug gipasakaan og kaso ang suspek apan human masayring mikiha ang biktima gidagmalan kini sa suspek maong nadungagan ang kaso niini.

Si Judge Yrastorza nikonbikto usab ni Alferez sa kasong physical injuries ug gisilotan og unom ka bulan nga pagkabilango.