Tabunok vendors panakpon

Cebu - Mibahad ang konseho sa dakbayan sa Talisay nga dakpon ug pamultahon na ang mga vendors nga magpunay og paninda diha sa mga sidewalk sa palibot sa flyover nga maglangkob sa mga sidewalk paingon sa St. Joseph Church ug ingon man sa mga sidewalk paingon ngadto sa barangay Lagtang.

Ang maong pasidaan giluwatan ni Konsehal Sabeniano Abatayo, kinsa maoy tsirman sa traffic commission sa konseho sa dakbayan ug nagkanayon nga sa unang kalapasan, P500 ang multa sa madakpan, samtang sa ikaduha, P1,000, ug sa ikatulo, ikiha na ngadto sa korte ang malapason, aron ang hukmanan na ang magbuot sa multa o kaha pagbilanggo sa tagsala.

Kini samtang gisugdan na pagdemolis niadtong Sabado sa hapon ang mga sidewalk vendors sa nahisgutang mga lugar agi'g pagpatuman sa giluwatang executive order nga nagmando sa paglimyo sa vendors sa maong mga dapit.

Sa pakighinabi sa Banat News kang Abatayo, kini mibutyag nga ang paghinlo sa maong mga lugar dili lamang tungod kay panahon karon sa Pasko.

Kini daan nang balaod nga dili patindahan og mga vendors ang maong mga dapit  apan wala kini tumana sa mga manindahay kay wala man usab ipatuman sa mga magbabalaod ang maong balaod.

Si Abatayo kinsa gibati og hilabihang kalagot, nagkanayon nga dili na nila karon pasayloon ang malapason , ilabi na kadtong maninda og pabuto sama sa mga rebentador ug uban pa.

Gani bisan ang mga drayber sa traysikad nga magpunay og tungkawo diha sa mga lugar nga gidili kanila, si Abatayo nagkanayon nga sikopon nila kining tanan.

Ang mga drayber sa traysikad nasayod na sa mga lugar nga dili paagian kanila apan gumikan kay nagmika man usab ang mga mananakop, nakahigayon usab sila sa paglapas sa balaod, matud pa sa ubang mga drayber nga mitug-an sa Banat News. – BANAT NEWS