Cebu - Kini sa dihang mitumaw na ang tubag sa mga pangutana kung kinsa ang nagpaluyo sa pagtungha sa ngalan ni Georgia Osmeña sa political scene sa siyudad sa Sugbu.
Kini bisan pa man kung wala pa hingpit ibutyag sa igsoon ni Mayor Tomas Osmeña nga kini magpapili pagka-mayor sa dakbayan sa umaabot nga 2010 elections.
Nasayran nga si Georgia nagparehistro na sa siyudad ug kini gipahibawo ngadto sa publiko ni Capitol consultant Rory Jon Sepulveda.
Una nang nagduda si kanhi Senador Sonny Osmeña nga si Gobernadora Gwendolyn Garcia maoy nagkombinser kang Georgia sa paglukso sa nagkainit nga kawa sa politika.
Ang maong pagduda gidasunan usab ni Cebu City Councilor Richard “Richie” Osmeña nga pag-umangkon nila ni Georgia ug Mayor Osmeña.
Apan niadtong miaging gabii nahatagan og gamay nga buslot sa kahayag ang maong mga pagduda human makita si Georgia uban kang Gobernadora Garcia.
Kini atol sa gipahigayong seremonyas sa pagpasiga sa mga suga sa Kapitolyo nga gitambungan sa kontrobersyal nga igsoon sa mayor.
Nahibaw-an nga si Georgia maoy usa sa giimbitar ni Garcia atol sa maong okasyon nga nakapahatag og tubag sa mga pagduda nilang Sonny ug Ritchie Osmeña.
Wala hinuon hatagi og laing kahulogan ni acting Mayor Michael Rama ang pag-imbitar sa Kapitolyo ngadto kang Georgia kay matud pa niya may mga higayon usab nga siya giimbitar usab sa pipila ka mga kalihukan sa kagamhanang probinsyal.
Sa pagkakaron mitumaw ang posibilidad nga sila si Georgia ug Rama posibleng mag-atbang sa umaabot nga piniliay pagka-mayor sa dakbayan kini kung makahukom ang igsoon ni Mayor Osmeña sa pagpapili sa 2010 elections bisan kung walay pagtugot sa BOPK.
Wala hinuon matandog si Rama sa maong posibilidad tungod kay giingong walay makapugong ni bisan kinsa sa pagpapili kung kini kwalipikado. – BANAT NEWS