Kawatan naabsuwelto

Cebu - Giabsuwelto sa korte sa kasong pangawat og kuryente ang duha ka tawo kinsa gikiha og “illegal connection” sa Visayan Electric Company (VECO.)

Ang giabsuwelto ni Judge Estela Alma Sinco sa RTC-7 Branch 12 mao sila si Jonathan de Guzman, ug Dionisio Villarta sa kasong paglapas sa Anti-Electricity and Electric Transmission Lines/Materials Filferage Act of 1994.

Nasayran nga niadtong Enero 18, 2003 sila si SPO1 Alejandro Jarina ug SPO2 Jesus Balaguer sa Cebu City Police Office nakadawat og alarma sa pangawat og kuryente diha sa dalan V. Rama Avenue, sa barangay Calamba, Cebu City.

Matud pa sa maong mga polis nga nasakpan nila inflagrante delikto sila si de Guzman ug Villarta nga mikabit og linya gikan sa linya sa Veco.

Apan dihang gisukit ang duha, mitug-an sila sa kapolisan nga igo lang silang gikontrata sa pamilyang Tolentino sa maong lugar nga magpataod og electrical lamp sa gate sa pinuy-anan niini.

Tungod sa kakuwang sa kapolisan og mga ebidensya batok sa mga suspek, si Judge Sinco miabsuwelto sa naulahi.

Samtang tulo ka mga kawani sa Metropolitan Cebu Water District (MCWD) gitulis didto sa barangay Bulacao, dakbayan sa Sugbu niadtong Biyernes sa buntag.

Ang mga biktima mao sila si Roselier Diaz, 40, minyo nga taga Consolacion; Eduardo Micaron, 37, minyo nga taga Hipodromo, Cebu City ; ug Feliciano Tolentino, 31, minyo nga taga Busay, Cebu City, samtang ang mga tulisan, duha ka mga gihulagway nilang batan-ong lalake. – BANAT NEWS