2 ka hitman sa bloods nasikop

Cebu - Gipasanginlang hitman sa Bloods ang nga usa ka ka minor de edad ug kauban niini nadakpan sa kapolisan human makuhai og armas atol sa usa ka checkpoint nga gipahigayon kagahapon sa tungang gabii diha may New Imus Road, barangay Day-as ning dakbayan.

Nagtingkagol   sa karsel sa Parian Police Station ang 17-anyos nga hitman sa Bloods gang ug silingang sakop sa sama nga gang nga usa ka 15-anyos. Ang duha pulos taga F. Villas   barangay T. Padilla.

Ang duha mag-atubang og kasong kalapasan sa R.A. 8294 kon paghupot og mga armas nga walay lisensya human nakuhaan sa ilang tagsatagsa ka posesyon og .357 magnum revolver, unom ka buhing bala ug .22 magnum revolver uban sa tulo ka buhing bala.

Sa spot report sa Parian Police Station, nasayran nga sila si SPO1 Maximo Lapa, PO3 Buenaventura Ursaiz ug mga kauban nga barangay tanod sa barangay T. Padilla, Sikatuna ug Day-as mipahigayon og checkpoint sa New Imus Road. Wala makapresentar og mga dokumento sa maong mga armas ang duha ka dinakpan.

Samtang sa laing checkpoint laing minor de edad nga gituuhang tulisan   nadakpan nga nagdala og armas nga walay lisensya nga nagsakay sa PUJ mga ala 1:20 kagahapon sa kadlawon diha sa may M.J. Cuenco Avenue duol sa karaang Pepsi Cola Plant barangay Mabolo.

Ang nakuhaan og .38 nga rebolber giila nga si Makoy (tinuod nga ngalan gipugngan), 17, taga Sitio Abuno, dakbayan sa Lapulapu. Nadakpan ni PO1 Ruben Perater atol sa checkpoint sa nahisgutang lugar. – BANAT NEWS