Drayber gipusil patay

CEBU - Patay ang usa ka habal-habal drayber human kini pusila didto sa sitio Pag-utlan sa barangay Tayud, lungsod sa Liloan niadtong Biyernes sa alas 7:00 sa buntag.

Ang biktima mao si Isidro de Gracia Garbo, 26 , ulitawo nga nagpuyo sa maong dapit samtang ang mipusil sa biktima,   wala hiilhi kinsa nagsakay og kolor pula nga XRM nga motorsiklo.

Si PO2 Retchel Jugalbot sa Liloan Police Station mibutyag sa Banat News ug mihingalan sa mga nakasaksi sa maong pagpamusil nga sila si Maribel Igot, 23; ug Teofilo Garbo, 45, nga uyoan sa biktima.

Si Igot ug Garbo mitug-an sa kapolisan nga naglingkod ang biktima sa waiting shade dihang kalit lang gihunongan sa usa ka motorsiklong pula.

Ang tawong nagsul-ob og kawo nga maoy nagsakay sa maong motorsiklo mideretso og duol sa biktima ug sa walay pupangutana miluthang sa naulahi.

Human sa maong pagpamusil ang wala hiilhing kriminal misakay og balik sa iyang sakyanan ug mipabulhot og padagan pahilayo sa maong lugar.

Ang biktima gihatod dayon ngadto sa Mandaue City District Hospital diin didto kini ideklarar nga dead on arrival.

Padayon pang giimbistigar sa kapolisan ang maong hitabo.   (BANAT NEWS)