200 ka computer nawagtang

CEBU - Gipaninglan karon si Mayor Lakambini Reluya sa lungsod sa San Fernando sa mga nangahanaw nga 200 kapin ka mga personal computers nga gidonar ngadto sa eskuylahan sa lungsod.

 Kini sa dihang giingong naglikay ang mayor sa paghatag og katin-awan bahin sa gidangatan sa maong mga computer.

 Si Konsehal Niel Enriquez sa maong lungsod nagkanayon nga usa ka negosyante nga mao si Steve Enad mihatag og kapin sa 200 ka mga bag-ong computer para sa mga tinun-an sa  Sangat National High School pipila na ka buwan ang nakalabay.

 Matud pa ni Enriquez nga si Mayor Reluya mismo maoy midawat sa maong mga donasyon gikan sa naasoy nga negosyante uban ang panaad nga siya na ang bahalang mo-turn over niini ngadto sa hingtungdang eskuylahan.

 Apan matud pa ni Enriquez nga wala nila igkita kining maong mga computer karon hinungdan nga giagda niya ang iyang mga kaubanan sa konseho sa pagkuwestion kang Reluya kun asa na ang maong mga computer karon.

 Kini tungod kay matud pa ni Enriquez wala madawat sa mga magtutudlo sa Sangat National High School.

 Apan matud pa ni Enriquez nga mihiwasa hinuon sa kasuko ang mayor dihang ila kining gisukit ug gihagit na hinuon sila sa pagkiha ngadto sa Ombudsman.

Tungod ning maong hagit misaad si Enriquez nga dili nila pakyason ang mayor aron makatabang ang Ombudsman sa pagpangita sa maong 200 kapin ka mga computer. (BANAT NEWS)