Ruiz magmayor sa Mandaue

CEBU - Natibuok na ang plano ni 6th District Representative Nerissa Soon-Ruiz alang sa iyang kandidatura sa pagka mayor sa dakbayan sa Mandaue sa 2010 election.

Si Kongresista Soon-Ruiz miluwat sa maong pamahayag isip panghimakak sa mitumaw nga taho nga matud pa adto siya mag-mayor sa LapulapuCity .

Giklaro sa kongresista sa ika-unom nga distrito nga ang iyang kapikas nga si Undersecretary Lito Ruiz sa Department of Interior and Local Government (DILG) maoy molansar pagka-mayor sa Lapulapu City, samtang siya (Nerissa) anha sa Mandaue.

Matud pa niya nga usa lamang kini ka pamaagi sa iyang mga kaatbang sa politika aron lawgawon ug libugon ang katawhan ilabi na ang iyang mga dumadapig.

Gipasabot ni Soon-Ruiz nga dugay na siyang nagtinguha nga moserbisyo sa Mandaue isip mayor ug karon nagtuo siyang matuman na kini pinaagi sa suporta sa katawhan.

Giangkon sa kongresista nga gihangyo siya sa iyang mga dumadapig sa dakbayan sa Lapulapu nga siyay pasakbangon sa ituboy ni Mayor Arturo Radaza nga kandidato pagka-mayor sa 2010 sa maong dakbayan.

Apan iya kining gibalibaran tungod kay gusto siyang anha mag- mayor sa Mandaue, matud pa ni Ruiz.  (BANAT NEWS)