Walay madawat nga suholan sulod sa lima ka adlaw ang hepe sa kapolisan sa San Francisco, Camotes, Sr. Insp. Ciriaco Larrobis human mapamatud-i nga sad-an sa kasong simple neglect of duty sa dihang gibiyaan sa mga sakop niini ang police station nga walay tawo, samtang 12 niini ka mga sakop mag-atubang sa kasong less grave neglect of duty sa Police Regional Office (PRO-7).
Gipahibalo sa hepe sa kapolisan sa lalawigan sa Sugbu Sr. Supt. Camelo Valmoria nga iya nang giduso sa Regional Investigation Detection and Management Division ang kasong administratiba batok sa 12 ka mga police non-commission officers (PNCO).
Si Valmoria mipasabot nga isip disciplinary actions lamang ang lima ka adlaw pagka-suspenso kang Sr. Insp. Larobis.
Samtang sa evaluation sa Provincial Investigation Detection and Management Branch nasuta nga less grave neglect of duty ang nahimo sa 12 ka mga PNCO hinungdan nga alang kaniya bahala na niini ang PRO-7 sa pagsilot niini.
Si Valmoria nagkanayon nga bisan tuod kun si Sr. Insp. Larrobis dinhi sa dakbayan sa Sugbu atol sa maong hitabo apan isip hepe sa kapulisan sa nahisgutang lungsod naglantaw unta kini og miseguro nga dili mahitabo ang maong insidente.
Dugang pa niini nga ang iyang lakang magsilbe kining warning niadtong mga polis nga dili magtinarong sa ilang trabaho.
Nasayran nga niadtong Nobembre 12, si Supt. Erson Digal Deputy Provincial Director for Administration sa CPPO maoy nakasikop sa maong mga polis nga wala sa police station sa San Francisco sa dihang wala gyuy mitubag sa iyang tawag.
Nunot sa maong hitabo, si Supt. Digal daling nanawag sa laing lungsod sa maong isla sa pagpadala og re-enforcement sa San Francisco sa ingon masigurong luwas ang maong police station. (Guam P. Logroño)