Sulbad na ang kasong pagpanulis sa Golden Treasures Best of Jewelry sa Mango Square Mall niadtong miaging semanahuman usa sa mga sakop sa pito ka mga tulisan nadakpan.
Si Sr. Supt. Patrocinio Comendador, hepe sa kapolisan sa dakbayan sa Sugbu nagkanayon nga ila nang gipasaka ang kasong robbery kagahapong adlawa batok kang Isidro Manlangit Sr. kini human positibong gitudlo sa nakasaksi sa tulis nga usa kini sa mga tulisan.
Si Comendador nagkanayon nga ang pagkasikop kang Manlangit kabahin pa kini sa ilang hot pursuit operations tungod kay sukad sa pagtulis sa Golden Treasures pabilin nila kining gipangita.
Nasayran nga mokapin sa usa ka milyon ka pesos nga kantidad sa mga alahas ang nadala sa pito ka mga tulisan human sa ilang pagtulis sa Golden Treasures Best of Jewelry diin walay nahimo ang mga security guard sa Mango Square Mall human ang mga tulisan nagdala og tag-as nga amas.
Si Sr. Insp. Michael Anthony Bastes, hepe sa Theft and Robbery Section (TRS) miingon nga dunay mo-testigos sa presensiya ni Manlangit niadtong Martes sa alas 3:30 sa hapon diha sa Cabantan St., barangay Luz hinungdan nga pinaagi sa joint operation sa Special Weapons and Tactics (SWAT) ug Investigation Detection Management Division ila kining nasikop.
Si Bastes nagkanayon nga ila nang gipasaka ang kasong robbery mga alas 4 pasado kagahapong adlawa human mipirma si Irene Young anak sa tag-iya sa Golden Treasures sa affidavit sa kaso ingon man ang usa ka saksi atol sa maong tulis.
Matud pa ni Bastes nga kasong robbery ang ilang gipasaka batok kang Manlangit samtang at-large ngadto kang Alicando Calong, Danny Masicampo ug laing upat nga wala mailhi.
Kusganong gi-insister niini nga lig-on ang ilang mga ebidensiya base sa positive identification sa mga saksi nga si Manlangit usa sa pito ka mga tulisan nga didto sa kan-anan maoy mipahapa sa mga tawo.
Matud pa niini nga nasulod pa sa hot pursuit operation ang pagsikop kang Manlangit hinungdan nga wala sila mabalaka sa pag-kwestiyon sa abagado niini nga si Atty. Chauncey Boholst.
Si Manlangit nga miatubang sa mga sakop sa media hugtanong mihimakak sa maong pasangil nga walay labot ug inosente sa maong kaso hinungdan nga giawhag niini ang mga testigos nga tarungon lang unta niini og tudlo gumikan kay sigurado siya nga nasayop lang kini sa pagtudlo kaniya.
Sumala pa niini nga nalooy siya sa iyang mga anak, asawa ug inahangumikan sa pasangil batok kaniya.
Gitataw niini nga nagtrabaho siya isip power plant technician sa East Asia Utility Corp. nga nahibutang diha sa barangay Ibo dakbayan sa Lapulapu sukad niadtong tuig 1997 isip usa ka Port Marine Engineer.
Apan iyang gitug-an nga niadtong 2006 gikuhaan siyag hulagway sa mga sakop sa NBI-7 human siya gi-pick-up didto sa ilang panimalay sa Pulang Bukid barangay Alang-Alang dakbayan sa Mandaue. (Guam P. Logroño)