Suspek sa tulis gipasakaa'g 3 ka kaso

CEBU – Pormal nang gipasaka sa piskaliya ang tulo ka kaso batok sa gidudahang tulisan nga nahulog sa mga kamot sa kapolisan niadtong nakalabay nga semana.

Si City Prosecutor Nicolas Sellon nisang-at sa duha ka kasong pagpanulis ug paghupot sa ihalas nga armas batok kang Micheal Brigoli kinsa maoy gitumbok sa kapolisan nga maoy responsabli sa pipila ka pagpanulis dinhi sa dakbayan.

Suma pa ni Sellon nga nakita niya ang lig-ong basehanan sa pagsang-at og kaso batok ni Brigoli ngadto sa korte tungod sa kapakyas sa pagduso sa iyang counter affidavit ngadto sa iyang buhatan dihang gipahigayon pa ang preliminary investigation.

Si Brigoli nadakpan sa kapolisan atol sa gipahigayon nga follow-up operation human mireklamo ang duha ka mga pasahero sa usa ka jeep de-pasaheroan nga iyang gitulis.

Ang positibong pagtudlo sa mga biktima sa tulis sa PUJ maoy nakalig-on sa maong kaso batok kang Brigoli.

Hinuon ang korte mirekomendar og P200 mil nga piyansa matag kaso alang sa temporaryong kagawasan sa dinakpan kinsa gidetiner na karon sa City Jail sa Kalunasan ning dakbayan sa Sugbu tungod sa kapakyas sa pagpiyansa niini. – BANAT NEWS