Supplemental budget sa city hall iduso

CEBU - Iduso na karong hapon atol sa sesyon sa konseho sa dakbayan sa Sugbu ang ikalima ug katapusan nga Supplemental Budget (SB-5) sa siyudad karong tuiga.

Ang chairman sa Committee on Budget and Finance sa City Council nga si Konsehal Joey Daluz maoy mopalabang og resolusyon niini sa City Council.

Matud ni Daluz nga mokabat sa P60 milyones ang SB-5 diin ang nag-unang gastohan niini mao ang pagpalit og mga heavy equipment ingon man mga sakyanan.

P28.8 milyones sa SB-5 ang igahin sa pagpalit og mga mini buses alang sa amihanang distrito, P10 milyones alang sa backhoe ug upat ka mini-dumptrucks.

Matud pa ni Daluz nga ang mga heavy equipment gikinahanglan kaayo aron makompleto ang mga kahimanan sa Department of Engineering and Public Works.

Midugang ang konsehal nga ang P5.7 milyones sa SB-5 gigahin usab sa City Hall alang sa financial assistance niini ngadto sa kabarangayan.

Partikular na ang paghatag og mga allowance sa mga garbage collectors, barangay tanod, ug sa mga sakop sa Lupong Tagapamayapa.

Lakip na usab niini ang pag-repair ingon man ang pagtukod og mga taytayan sa bukirang mga barangay sa siyudad sama sa Guba ug Adlaon.

Dugang niini, kuhaan usab ang maong gahin sa pagmugna og water system diha sa barangay Busay, ug sa pagtrabaho sa drainage system sa barangay Tisa.

Sa P59,575,741.18 nga supplemental budget, P23,266,902 niini ang kuhaon gikan sa General Fund samtang ang P36,308,846.18 sa Special Accounts sa siyudad.

Gipasabot ni Konsehal Daluz nga adunay pipila ka mga item sa SB-5 nga wala na manginahanglan og fund sources.

Kini tungod kay giingong i-realign na lang ang ubang pundo nga alang sa equipment alang sa City Treasurer’s Office, Office of Civil Registrar ug uban pa. – BANAT NEWS