Bimbo midepensa sa sugyot sa FLI

CEBU - Gipanalipdan ni Cebu City Administrator Francisco Bimbo Fernandez ang pagpublikar sa imbitasyon sa siyudad alang sa gustong mopalabaw sa proposal sa Filinvest Land Incorporated (FLI) pagpalit ug pagpakig-joint venture niini og luna diha sa South Road Properties (SRP).

Ang Filinvest interesado pagpalit og napulo ka ektarya sa SRP sa kantidad nga mokabat sa P1.5 bilyones apan bayran niini sulod sa tulo ka tuig.

Lakip sa proposal sa Filinvest mao ang paggamit og laing 40 ka ektarya sa SRP pinaagi sa joint venture diin kini mohatag unya sa siyudad og 10%sa Gross Income.

Matud ni Fernandez nga walay irigularidad sa gipublikar nga imbitasyon tungod kay ilang gisunod ang nalatid sa Joint Venture Ordinance sa dakbayan.

Una nang miisa ang kilay ni Capitol consultant Rory Jon Sepulveda sa gipamantala sa siyudad tungod kay wala iapil niini ang nasabutan tali sa Filinvest.

Gibati og katingala si Sepulveda nganong interesado man kaayo si Mayor Tomas Osmeña sa tanyag sa Filinvest nga unta daghan pa man tingale unta ang mosubasta og dakokay sa gitanyag saFilinvest.

Gani may ubang tigpaniid nga nagkanayon ngaang labing naandang bahin niining susamang mga patigayon mao unta ang 60-40 porsento nga binahinay.

Buot ipasabot nga tungod kay sa kagamhanan man sa syudad ang yuta samtang ang Filinvest, mao may developer angayan unta nga 60 porsento sa Filinvest ug 40 porsento sa City Hall ug dili kay 10 porsento lang ang sa naulahi sa tanang kitaon diha sa SRP.

Gipadayag hinoon ni Fernandez nga gawas sa ilang gisunod nga ordinansa, gihangyo usab sa Filinvest nga adto lang ihatag sa “eligible to bid” ang ilang giduso nga proposal.

Giklaro hinoon sa City administrator nga mapublikar ra gihapon ang mga dokumento nga gustong masayran ni Sepulveda.

Basi sa gipublikar nga imbitasyon sa dakbayan, ang Joint Venture Selection Committee modawat lang sa eligibility requirements hangtud sa Disyembre 22, 2008.

Pagkasunod adlaw ihatag gilayon niini ang tender documents ngadto sa mga interesado nga makasumiter sa unang gikinahanglan.

Samtang ang katapusang adlaw sa pagpanawat ug pagbukas sa comparative proposals gitakda sa Enero 23, sunod tuig. – BANAT NEWS