Healing mass para ni Tomas gihangop

CEBU - Gihangop niacting Mayor Michael Rama ang nahuna-hunaang lakang ni Georgia Osmeña pagpasiugda og healing mass alang sa iyang igsoong si Mayor Tomas Osmeña.

Matud ni Rama nga ang nahisgutang spiritual activity dako og matabang sa mayor kinsa padayon karong nagpatambal sa iyang sakit nga urinary bladder cancer.

Gipadayag sa acting mayor nga isip mga Kristiyanos, dili mawala ang pagtuo ilabi na sa mga Katoliko Romano nga dunay milagro.

“Naa man nay giingon gud nga Kristyanos man ta, Roman Catholic, motuo gyud ta og milagro, motuo gyud ta og divine intervention,” sumala ni Rama.

Nasayran nga giplanohang imbitahon ni Georgia ang tanang politiko sa Sugbu pagtambong sa healing mass nga gitakda karong Sabado.

Wala hinuon mopasalig si Rama nga motambong sa nahisgutang healing mass nga posibleng anha ipahigayon sa Basilica del Santo Niño.

Una nang nabaniog nga si Georgia posibleng magpapili pagkamayor sa siyudad sa umaabot nga 2010 elections.

Kini human usab magparehistro sa Comelec sa dakbayan niadtong miaging semana uban sa pagpadayag nga bukas ang iyang huna-huna sa politika.

Kung matinuod ang pangagpas sa mga tigpaniid sa politika sa Sugbu mahimo nga ikaatbang ni Georgia si Rama sa umaabot nga piniliay.

Kini tungod kay ang acting mayor dugay nang nakadisidir nga magpapili pagka-mayor sa dakbayan human usab ipahibalo ni Mayor Osmeña nga maoy ihulip kaniya. – BANAT NEWS