Mibahad ang hepe sa kapolisan sa lalawigan sa Sugbu Sr. Supt. Carmelo Valmoria nga iyang siguraduhon nga madugta gyud sa bilanggoan si PO1 Jose Dennes Malazarte kinsa maoy mipusil patay sa iyang bayaw niadtong Sabado sa kaadlawon atbang nga bahin sa Cebu South Bus Terminal Natalio Bacalso Ave., barangay Sambag 1 ning dakbayan.
Kini maoy gipadayag ni Valmoria sa mga tigbalita human usab si PO1 Malazarte mipadayag nga wala siya magmahay ug mas gikalipay pa niining mabilanggo sa kasong murder aron dili na siya makagawas ug makasala pa.
Matud pa ni Valmoria nga iya nang gimanduan si Supt. Romeo Perigo, hepe sa Provincial Investigation Detection and Management Branch (PIDMB) sa pagpadali sa imbestigasyon sa kasong administratiba batok kang PO1 Malazarte human usab ila nang nadawat ang report sa pagpamusil niini.
Sumala pa ni Valmoria nga ang gibuhat ni PO1 Malazarte usa ka grave misconduct isip usa ka sakop sa PNP ug ang silot niini pagkatangtang sa serbisyo samtang magpadayon ang kriminal nga kaso niini.
Gipasabot niini nga bisan kun off duty si PO1 Malazarte atol sa maong insidente isip usa ka polis dili siya makalikay sa kasong administratiba. “He is a police wether he is off-duty or not…liable siya sa kasong administratiba. “Siguraduhon nako mataktak siya,” sumala pa ni Valmoria.
Gipasabot niini nga isip usa ka polis kalmado unta kini sa tanang mga sitwasyon.
Nasayran, si PO1 Malazarte, kinsa nadestino sa Provincial Police Headquarters ug gi-detailed sa Cebu South Bus Terminal, nakapusil patay sa iyang bayaw nga si Beinvinido Alformon niadtong Sabado sa kaadlawon human siya gitawag niining “bayot” ug “talawan” human sa ilang panaglalis. Sa kalagot gipauwanan niini og bala makadaghang higayon ang biktima hangtod namatay.