Drayber gipusil patay

Gipusil patay ang usa ka drayber sa habal-habal didto sa Barangay Prenza, lungsod sa Balamban niadtong Domingo alas 6:00 sa gabii.

Ang biktima nailhang si Rumolos Sasing, 35, minyo nga taga barangay Vito, sa maong lungsod, samtang walay nakaila sa duha ka kriminal kaniya.

Si SPO2 Bartolome Fajardo sa Balamban Police Station uban ni PO3 Celso Diez ug PO2 Hannibal Larida mibutyag sa Banat News nga ang biktima nagmaneho sa iyang motorsiklo paingon sa Poblacion, Balamban aron ihatod ang iyang pasahero samtang ang mga kriminal nagsunod ra usab kaniya.

Apan pag-abot sa biktima sa nahisgutang lugar kalit lang mi-overtake ang nagsunod kaniyang motorsiklo ug sa pagsaylo niini og dyutay, ang backrider milanit sa iyang armas de fuego ug gipusil ang biiktima.

Gumikan sa pagkasabak sa bala niini, nabalintong ang motorsiklo samtang mitugpa sa karsada ang biktima nga naghayang.

Apan mikanaog ang duha ka kriminal ug gipaarakan kini og daghang mga bala sa nagkalainlaing dapit sa ikyang lawas lakip na ang nawong sa biktima nga maoy hinungdan sa hinanaling kamatayon niini.

Ang babayeng pasahero sa biktima puwerting dagana sa kabalaka nga mapagan siya sa maong pagpamusil.

Dihang nasuta na sa duha ka kriminal nga patay na ang biktima, mipasirit dayon kini’g padagan sa ilang sakyanan.

Hangtod sa pagsuwat ning maong balita padayon pang giimbitigar sa kapolisan ang maong hitabo.)